Það er ekki á hverjum degi sem torfærubíll fær nafn sem gæti eins vel átt heima á sveitaballi – en svona er það þegar Páll Skjóldal Jónsson, betur þekktur sem Palli Rolla, á í hlut. Hann er ökumaðurinn á bak við Rolluna, hraðaksturs-kindina sem hefur stokkið, oltið og spænt yfir allt sem mögulega gæti kallast braut.

Frá brjósti í brjálæði

Palli er alinn upp á Efri-Úlfstöðum, Austur-Landeyjum, þar sem torfæran virtist nánast renna með móðurmjólkinni. Hann var ekki orðinn fjögurra ára þegar hann byrjaði að hlaupa niður að póstkassanum í von um að stökkva inn í bíl hjá næsta manni sem kom að sunnan – bara til að komast í bíltúr. Fyrstu farartækin voru dráttarvélar, svo komu mótorhjól og loks bílar – og svo, að sjálfsögðu, Rollan.

Mótorsportferillinn – og Rollan fæddist

Árið 2015 steig hann fyrst inn í keppnisakstur, í rallycross-flokknum sem kallaður er 4x4 krónu flokkur“ Þar tókst honum að vinna bikarmeistaratitil – jafnvel á lánsbíl!

Árið 2017 læddist draumurinn aftan að honum. Hann fékk sér torfærubíl, endursmíðaði hann og gaf honum nafnið Rollan – nafnið kemur frá grunnskólanum þar sem eftir fermingu óx miklar krullur á höfði Palla sem fékk þá uppnefnið Palli Rolla. Í stað þess að láta þetta á sig fá, nýtti hann þetta nýja viðurnefni og nú er þetta nafn sem enginn gleymir.

Síðan þá hefur Palli tekið þátt í keppnum víða um land – Hellu, Egilsstaði, Akureyri og einni erlendis í Noregi og Bandaríkjunum – og orðið bæði Íslandsmeistari í sandspyrnu og þekktur fyrir að keyra eins og hann skuldi öllum í áhorfendasvæðinu pening.

Árið 2023 lagði Palli land undir fót og keppti í stórri torfærukeppni í Noregi. Þar lenti hann í miklu basli og virtist ferðin hafa farið til einskis en með gott lið á bakvið sig sem gerðu kraftaverk og komu þeir bílnum í gott stand og náði Rollan að landa fyrsta sætið annan daginn.

Árið 2024 var fyrsta skiptið sem Palli þurfti að taka sér pásu frá torfærunni vegna bakbrots, en hann brotnaði í þriðju braut á Hellu. En þrátt fyrir bak brotið þá náði Palli að komast á pall og endaði í þriðja sæti.

Rollan Racing væri ekki hér í dag nema fyrir frábæran hóp sem hefur stutt Palla í öllum hans ævintýrum.

Rödd torfærunnar – og podcast líka!

Palli er ekki bara á gasinu – hann er líka með hljóðnema. Hann stýrir hlaðvarpinu Torfæruspjallið með Andra Á kúrekanum, þar fá þeir til sín keppendur, liðsmenn og furðufugla úr mótorsportinu og ræðir torfæruna á eigin forsendum – með húmor, innsýn og smá drullu í hverri setningu.

Hann er líka duglegur að kynna torfæruna opinberlega og mætir reglulega á útvarpsstöðina X977, þar sem hann heldur sportinu lifandi í eyrum landsmanna með krafti, karakter og krullum.

Á bakvið tjöldin líka

Palli er í stjórn innan Akstursíþróttasambands Íslands (AKÍS) og einnig vara formaður í Torfæruklúbbnum þar sem hann vinnur að því að bæta, þróa og halda við sportið sem hann elskar. Hann tekur þátt í skipulagningu viðburða og hjálpar til þar sem þarf – hvort sem það er með skipulagi, símhringingum eða trúðslátum

Ef þú ert ekki búinn að kynnast Rollunni og Palla – þá ertu að missa af. En það má laga það núna.

Liðið

Varningur

Dagskrá 2025

Myndbönd

Styrktaraðilar

Samfélagsmiðlar